September Kelabu

September 1961.

Udaro lindok, awan bararak pagi hari. Kota pagunungan. Tabayang De Kock mambangun kota jo arsitektur, 1400 meter dari pamuakan lauik. Kota nan dimulai dari benteng, untuk malawan penyarbuan rakyaik Kamang kutiko parang Bonjo, sampai ka parang Kamang. Dari Benteng de Kock nampak Gaduik, Tanjung Alam, Kapau.

Tabayang parang Kemerdekaan. Balando manduduak-i Bukiktinggi. Sasudah manembak palabuan kapa tabang Gaduik.”

Desember 1948.

Benteng de Kock jo janjang Ampek Puluah kambali bafungsi. Tampek manembakkan Houwitzer nan banyak latuihnyo. Dum... duuum... duuuummm... duuumm... baar... baar... baar ... baaar! Iyo bana manciuik bunyinyo.

Zaman Japang.

Parewa anak sikola kalaih tigo. Sikola desa manjalang masuak ka sikola Gubernemen kalaih limo.

Palabuan kapa tabang Gaduik Bukiktinggi, sangaik raminyo. Tiok nagari di Kabupaten Agam, mambaok rakyaik bagotong-royong. Mampaleba palabuan Gaduik. Ayah parewa manjadi Kapalo Nagari Suraukotosamiak sajak taun 40-an, baranti akhie taun 50-an. Suraukotosamiak jo Auoparumahan adolah ciek ka Larasan.

Namonyo Lareh Kamang. Dalam parang kemerdekaan II, Suraukotosamiak jo Auoparumahan batuka namo. Suraukotosamiak manjadi Kamangmudiak, Auoparumahan manjadi Kamang Ilia. Suraukotosamiak, Auoparumahan, Salo, Sungaijaniah, termasuk Onderafdeling Agamtuo. Asisten Damangnyo ka Baso. Sangkek ayah parewa manjadi Kapalo Nagari Suraukotosamiak, Asisten Damang Kamang Baso, Kaharuddin. Kantuanyo di Pakansinayan, Baso, sampai Japang masuak 1941.

Kapa tabang maraung-raung di palabuan Gaduik. Palabuan Gaduik Bukittingi, tampek pilot-pilot Japang latihan. Pagi-pagi alah tadanga rauang pisawek. Biasonyo, pisawek-pisawek ketek samodel ‘mustang’ jo ‘icineng’. Babaliang ciek, tapi gadang raungnyo.

Parewa kalaih ampek sikola Gubernemen kini. Tiok pagi ka pai sikola mambaok sakaruang daun bungo rayo. Katonyo, untuak pabirik karateh di Sungaitanang dakek sentral listrik Padanglua. Sampai di tampek sikola, di Durian, namonyo. Pagi basenam “taiso” namonyo. Sasudah tu “saikere” ka “Tennohaika” ka Matori tabik. Mambungkuak 90 darajat, sambia mangucapkan “Tennohaika Saikere...!”

Sasudah basenam, “taiso” tu. Pai bakabun jaguang, rambuik bacukua boleng.