Den...Den...Den Kanai

ARI barabuik sanjo, patangahan bulan Juni 1958 tu. Udaro sajuak. Malam ka tibo. Kumpi Mawar basiap-siap jo pasukannyo. Parentah untuak masuak Kota Bukiktinggi alah ado. Tantara pambarontak di daerah Agamtuo, tadiri dari batalyon-batalyon 2001, 2002, 2003, 2004 dan 2005. Ado kumpi dan datasemen nan indak masuak kalimo batalyon tu.  Sarupo Kumpi Mawar jo detasemen Panah Baracun, badiri sandiri pulo. Batalyon-batalyon nan limo tu dibawahi dek Resimen II Utara. Kalau indak salah, kumandan resimennyo Letkol Abunawas. Kumpi Mawar di ma Parewa bagabuang badakek-an daerahnyo jo batalyon 2003. Tasabuik batalyon bagak, kumandannyo Benny Zadelberg, bapangkek Inspektur Polisi jadi kumandan Kumpi 5149 Mobbrig Padangpanjang. Panah ikuik pai ka Aceh taun 1953, kutiko Daud Baureah mambarontak ka Republik Indonesia.

Pemerintahan Revolusioner Republik Indonesia (PRRI) diumumkan, Zadelberg mambuek ciek kumpi Mobbrig, yang dibari inisial 5831. Ado duo kumpi Mobbrig di batalton 2003, ciek kumpi 5152 namonyo, di sampiang tu batalyon 2003 ado pulo Kumpi Pak Dede (Pasukan Dahlan Djambek), kumpi TP dinamoi juo kumpi IV dan Kumpi V.

“Pasukan siap untuak barangkek.” Wakia Kumandan Kumpi Mawar, saurang Barigadir Polisi Mobbrig banamo ADL. Inyo urang nan sarius bana. Indak banyak curito. Kutiko jadi Mobbrig Pusaik, inyo panah juo pai ka Aceh. Inyo malapor ka Uncu, sabagai kumandan kumpi.

Peta dikambangkan. Di ma masuak Kumpi Mawar alah jaleh. Pasukan siap barangkek. Sanjatonyo, paluru baitu pulo, Uncu, matonyo merah. Barangkali dek banyak pikia, karano pasukannyo urang orang mudo, mahasiswa pulo lai.

Pajalanan malam tu ka Bukiktinggi malalui jalan kampuang. Bukiktinggi manuruik katarangan Si Satu, banyak diunyi dek tantara nan manyarah di sampiang batalyon nan dibaok dek Kol. A. Yani sebagai Kumandan Operasi 17 Agustus. Kumpi Mawar masuak lewat Ipuah Mandiangin, dan pasukan Zadelberg lewat Bukikambacang, taruih ka Pintukabun, taruih ka Tembok Bawah.

“Badanciang-danciang paruik, gadubak gadabua dado.” Parewa bagarah jo Wakia Kumandan Kumpi ADL. Wadanki ADL mambao sanjato thomson bamagazin bulek piriang. Parewa basinjato jungle rifle, jenggel tangkai kayu organik Mobbrig. Jenggel lipek baru datang sasudah droping sanjato di nagari awak ko. Parewa sarupo bapikia-pikia, karano Mobbrig yang ikuik masuak rimbo jo PRRI, indak dapek sanjato droping tu doh!.

“Lato, siap-siap. Kito alah ampia tibo di Ipuah.”  Wadanki ADL mangijok Parewa. Malam tarang-tarang lareh, lai nampak puncak iduang. Sakitar 11 malam, alah tadanga latusan. Kambang api nan dilapeh Tantara Pusaik dari dalam kota, alah bakilek-kilek. Latusan dari janjang Ampek Puluah, Kandang Gajah Kabun Binatang, iyo alah manyalak pulo. Dari arah Pintukabun, Park Hotel, Kampuang Cino alah tadanga dendang 12,7 nan dibaok dek pasukan Zadelberg jo Jeep Wilys, nan panah nyo baok ka lua Kota Bukiktinggi.

Sabagai urang mudo nan baru sakali pai parang, iyo indak tabado-bado gumbiranyo. Pasukan Mawar dari Ipuah, taruih ka Simpangmandiangin lewat gudang kayu, di mukonyo rel kareta api dan sikola rakyaik nomor 11 jo 12. Dakek simpang Lambau, sapanjang rel kareta api, Tantara Pusaik alah maanok di sinan. Latusan bajadi-jadi. Dari arah Birugo, Jambuaie, Ujuangbukiktarok dan Lambah, tantara pambarontak alah manuju pusaik kota.

“Awak alah tibo di Pasabawah. Sabagian alah pulo ado di Pasabanto.” Wadanki ADL jo ati-ati mambari tau. Sabagian pasukan  Mawar alah tibo di dakek Janjang 40, malinteh ka gaduang bioskop. Kudian tadanga latusan bazooka.

“Salamaik, salamaik…salamaik!” Ado suaro dari baliak-baliak kadai. Urang-urang manggaleh nan indak ikuik kalua kota. Taraso simpati bana ka tantara pambarontak nan masuak Kota Bukiktinggi malam tu.

“Den kanai…den kanai…den kanai!” Tadanga suaro dakek rumah Pak Hatta. Suaro tu kacenoan, sarupo suaro Nasir Atai, dari pasukan Kumpi Mawar. Nasir Atai adolah Mobbrig Kompi 5274 Alai Padang, nan bagabuang jo kumpi mahasiswa Mawar