Jalan Luruih ka Simarasok

 SAWAH bapetak-petak di panorama Tabek Patah. Lanskap nan rancak dalam foto. Bajalan ka Mandahiliang, parak tabu batang aia ketek. Mandaki jalan ka sarasah Gunuang Marapi. Manurun jalan ka Supayang. Tabayang galodo Pasia Laweh. Onde Mandeh, awan bararak di kaki Marapi! Sago sarupo gajah lalo sanjo hari.“Sangsai den!”
“Mamanjek batang anau.”
“Panuah saga.”
“Ijuaknyo kasa-kasa.”
“Untuak atok rumah gadang.”
“Sambilan ruang.”
“Halamannyo laweh.”
“Salanja kudo balari.”
“Sabai.”
“Sabai!”
“Matoari taguliciak.”
“Rajo Babandiang naik kudo.”
“Bendi Bugih.”
“Kudo sirah kararanggo.”
“Bajalan manjalang sanjo.”
“Ka rumah Sabai Nan Aluih.”
“Mangkutak sadang maanju layang-layang.”
“Tangah hari bapengeang.”
“Mailia paluah licin.”
“Anak jantan bege.”
“Anak Rajo Nan Panjang.”
“Adiak si Sabai bahati jantan.”
Jalan Luruih ka Simarasok. Kureta mandaki Titih. Manurun ka Tambunijuak. Sasimpang jalan ka Batuhampa. Manurun jalan ka Piladang. Kureta manciuik-ciuik. Kureta bagigi basi, soh .... sooh, bunyinyo. 
“Petak-petak sawahlaweh.”
“Di kaki, kaki bukik di puncaknyo darau cumaro.”
“Malinteh angin basiua hujan.”
“Marandah awan.”
“Dipanurunan Ampuah.”
“Urang mamacah batu.”
“Batu kareke di kunyah masin.”
“Nasib sarupo kalalaso.”
“Hitamnyo!”
“Pitam hatinyo.”
“Sabuang salapeh hari patang.”
“Balati mahampeh-hampeh dalam saruangnyo.”
“Tikam!”
“Tikamkan sampai ka hulu!”
“Aden di siko!!” RMS

Haluan, Minggu 6 Juni 2004