Kutiko Kaadilan Bulek Talua

“ALAH kalian mambaco curito the Animals Farm karya George Orwell,” sogah Parewa kapado sakalompok mahasiswa di ateh cigak baruak  manuju sabuah kampus di Padang Kota Tercinta. Matohari pagi sangaik bandarangnyo. Angin manggalitik karah kameja.

“Apo carito  Partanian Binatang tu Pa?” kato sorang mahasiswa nan lah tahu jo Parewa. Biasonyo panggilan Parewa, gadang ketek mayabuik “Papa”. Alah nyo sangko gaek bana Parewa, uban se alun tumbuah lai.

“Buku Partanian Binatang, fiksi karya Orwell tu, mancuritokan parangai binatang-binatang nan ado di dalam kabun binatang. Singo banyak ulahnyo, harimau iyo batingkah pulo, alun babi gapuak nan gadang salero. Di dalam kabun binatang tu, iyo bakumpua sakalian parangai binatang. Kadang-kadang marupokan Parlemen binatang. Masiang-masiang binatang punyo visi ka dapan, puyo rancano karajo. Curito tatap sajo maso dapan, indak ado nan bisisuruik do. Kok basisuruik, mancaliak ka bulakang, itu indak kreatif namonyo. Nostalgia tu mah!” Parewa sarupo mambari caramah pulo di ateh cigak baruak tu.

“Apo binatang bapolitik pulo? Inyo bagi-bagi pulo kurisi antara kawan-kawannyo. Bagigiah dalam sidang, mambagi-bagi rasaki. Alun bara bulan duduk, nasibnyo sajo nan nyo uruih,” tanyo sorang mahasiswa nan duduak dakek sopir cigak baruak.

“Kaadilan tu utopia tu mah. Kaadilan tu ado dalam kata-kata mutiara, nan dikarang dek urang bijak,” sorang mahasiswi rampiang pakai blujin, baka turun di simpang gang kelokan tu. Mahasiswi tu rajin mambaco difinisi Robert Malthus, partambahan penduduak samacam deret hitung, partambahan ekonomi sarupo deret ukua.

“Kaadilan sarupo bulek talua. Indak bulek bola do. Jadi indak ado kaadilan nan samparono di dunia ko doh!” Parewa kadang alah jadi Sokrates, Si filosof Yunani tu, tapi untuang kapalonyo indak colak. Parewa sangkek mudo, sanang bana mambaco Demokrasi Kita karya Bung Hatta. Labiah-labiah tantang curito buruang antu nan mambuek sarang di kayu lapuak di tapi tabek musim kamarau. Buruang antu sanang-sanang tingga dalam sarangnyo, nan indak dapek dek cahayo matohari. Buruang antu suko bacurito, kadang-kadang mambari nasehat kapado buruang-buruang lainnyo. Dalam nasehatnyo, bahaso dalam masyarakaik burung, indak buliah makan-mamakan, hiduik haruih jujua.

“Kak buruang antu, iko ambo ado mambao talua. Sangajo ambo bao untuk kakak,” manciloteh buruang gagak, dakek sarang burung antu di tapi tabek musim paneh tu. Nampaknyo burung antu basalero pulo joa talua tu, tapi lupo, bahaso talua tu baru sajo dirampok dek buruang gagak dari sarang buruang pipik.

Buruang antu nan suko mambari pitua, indak parnah mancubo kalaparan. Inyo basarang di tapi tabek, litak paruiknyo, inyo pai marancah ikan nan kalimpasingan di tabek kariang.

‘Mujilihi di tapi aie maradeso di paruik kanyang’. Kato-kato tu salalu kalua dari papatah-patitih Mak Datuak Lekam. Rancak baraja di cadiak buruang antu. Paruik kanyang, kato-kato tasendeang dapek pulo.

“Bay…bay…bay!” Cigak baruak alah sampai di pintu kampus. Masiang-masiang urang turun. Parewa sato turun, karano inyo kamambari caramah jo kalompok diskusi anak mudo, jo topik Manulih Fiksi kutiko Fakta Sadang Tiarap. Paneh pagi mulai manggigik…

Haluan, Minggu 14 Mei 2000