Daroping Sanjato Indak Jadi

Mai 1959 ….

(Nostalgia). Parewa baru baumua 23 taun. Jo tinggi badan 161 cm, barek 53 kg, bidang bau nan agak laweh karano taruih tiok pagi naiak reng stok. Sakaciak angkek barbel, suko olahraga, labiah-labiah jalan kaki tiok pagi.

Parang sudaro sadang bajadi-jadi. Ado tantara pambarontak nan panakuik, ado pulo nan suko parang, walaupun inyo indak banomor register Pusaik (NRP), tapi sumangeknyo untuk baparang jo badia amburuh polisi model kuno. Badia amburuh nan dipakai dek upeh Kurinci taun 40-an. Bakokang ciek-ciek, jo paluru 7,7.

“Basah sarawa Mak Mantari ko,” sogah Parewa, kutiko tantara Soekarno, Tantara Pusaik masuk Gaduik taruih ka Kaluang. Capuang (kapa tabang nan tabangnyo sarupo sipatuang) nan mairiangi Tantara Pusaik, alah tadanga ngengeknyo. Sabanta alah tadanga bunyi mortir 8 inchi.

“Tantara Pusaik masuak, Tantara Pusaik masuak!” Tadanga pupuik tanduak jo tontong basaui-sauik-an. Banyak pangungsi babondong-bondong mambao arato nan ado di badan. Daripado manyarah ka OPR, labiah baiak awak bunuah diri. Itu pendirian pengungsi nan rami tu.

“Musim parang ko, iyo indak ado kasiah sayang lai.” Kak Siti nan biaso disabuik seksi G  tu mambirunguik, karano Tantara Pusaik tu ampia tiok ari masuak ka daerah pambarontak. Manyigi-nyigi sabanta, beko baliak ka kota. Tantara pambarontak nan suko lari-lari sajo alah maota pulo di suduik kampuang.

“Awak nan takuik jo Tantara Pusaik ko, iyo tembak bawah, indak tembak ateh doh!” Kak Siti sadang maetong-etong bungkuih nasi untuak pasukan sukarela nan barani parang. Sajak subuah cako lai, latusan baganti-ganti. Lai tadanga bunyi  karaben pikpong. Ado pulo tadanga bunyi garrand, ado pulo brengun MK III. Bunyi kacang goreng barandang.

“Agiahlah kain sirah tu sakarek. Untuak pangabek kapalo!” parentah Parewa ka Mak Mantari nan sajak matoari naiak cako, inyo mancaliak ka muko, kok lai nampak tantara  pusaik tu sadang inderlag. Biasonyo Tantara Pusaik tu suko manyisia-nyisia jalan kampuang sambi maariak-ariak urang rundo.

“Tabik bana bagak Parewa ko mah! Tantara Pusaik suko mangguntiang dari balakang.” Mak Mantari mangunci brengun yuliana-nyo, nan sajak pagi basiap-siap untuak manyalak.

Parang dimanangkan dek urang nan panjang umua. Ajun Kompol Rozer Bahar jo kacomatonyo nan nampak sariuih, basuo di daerah partempuran jo Kapalo Polisi Sumatra Tengah. Indak tangguang sanang ati kami malam tu: patamuan nan indak disangko-sangko.

Ubungan Palupuah jo Padang Sidempuan jo Natal, sangkek tu masih lancar. Tantara Pusaik baru muloi ka masuak Aiebangih. Antaro Aiebangih jo Simpang Panti, ado pasukan-pasukan dari Batalyon Zadelberg dan Batalyon Imam Bonjol. Chairudin Nasution, Komandan Batalyon 2003 B. Zadelberg mambukak peta Pasaman.

“Sakitar bulan Juni 58 iyo ado pasukan rombongan Jendral Jatikusumo, lewaik siko. Tapi cuma lewaik sajo!” Saurang Komandan peleton dari Kompi 5152 pambarontak malapor.

Ambun turun manitiak, udaro dingin manggigik tulang. Patamuan jo pak Sutan Soeis barakhia. Kami pun barangkek ka pos kami masiang-masiang. Pak Sutan Soeis manaruihkan pajalanan baliau jo rombongan, ka satu daerah nan dirasiokan. Ka suatu tampek, baitu biaso dikatokan bahaso saari-ari kami kutiko parang sudaro.

Gempuran Tantara Pusaik alah batubi-tubi. Ado namonyo Operasi Samuik, ado pulo namonyo Operasi Badai. Tantara Pusaik mulai baraja jo strategi Bulando kutiko manaklukan Bonjo. Tiok daerah nan dibebaihkan, inyo buek pos barantai, walaupun nan maisi pos tu OPR sajo. Ado pameo, bilo Tantara Pusaik kanai, inyo baka kampuang ditampek tu. Sarupo Tantara Pusaik jo rombongan panser tang waja, tasoleang ditembak jo bazooka di Batang Aiekatiak. Kudian, inyo baka rumah-rumah rakyaik di simpang Biaro.