Inyo Guntiang Den

“Limpaduak!” katonyo kareh.

“Tantara Soekarno masuak!” jaweknyo. Jangguiknyo manggigia. Pukua ampek subuah, latusan marandang kancang arah Kapau. Daru oto reo mandanguik mambao tantara.

“Baa, ka seteleang?” Kumandan mancaliak ka paletonnyo nan sadang tagaletak lalok. Di lua rumah, ambun jantan jatuah ka kaniang taraso ngilu. Bulan Desember kini. Parang sudaro alah bajalan ampia sataun.

Dum…bar…duum….bar!” Mortir lapan babunyi. Barangkali pasukan Tantara Pusaik ka operasi ka Kamang. Ado tigo jalan nan dapek manyapik gurila pambarontak. Dari Pintukabun, Bukikambacang, Gaduik, Pasadama, Bukikkaluang. Dari Mandiangin, simpang Kapau, Matoaia, Pakankamih, Bukikkawin. Kudian, ado dari Tanjuangalam, Lungguakmuto, Padangbasasak, Bukareh, Bukikkuliriak.

Dalam parang sudaro, Tantara Pusaik banyak malakukan kapuang-mangapuang, japik-manjapik, jo guntiang manguntiang. Di tantara pambarontak, ado duo pilihan: ka seteleang atau  maanok. Seteleang aratinyo ikuik maadang, bilo maanok, maju ka muko atau masuak ka daerah pandudukan.

Dalam parang sudaro, indak ado bedo tantang strategi jo taktik. Tantara pambarontak jo tantara Soekarno samo-samo sapaguruan. Pambarontak ado nan tamaik pandidikan Cimahi, SKI Pematang Siantar, atau pendidikan Batujajar. Kok Mobbrignyo, ado nan tamaik pandidikan Padangpanjang, Sukabumi, jo Parong.

“Dalam parang, salalu dimanangkan dek urang nan panjang umua.” Kumandan bacarito katiko Tantara Pusaik alah baliak ka Kota Bukiktinggi. Kumandan urang nan lapeh pendidikan sakolah tantara Bulando. Karano inyo Indo, disabuik tantara KNIL. Kutiko Japang masuak, inyo dibaok dek tantara Japang ka Thailand.

“Lai takana, kutiko Kolonel A.Yani mamasuak-i Padang. Taktiknyo sarupo tantara sakutu mandarek di Normandia?” Kumandan sarupo mangana-ngana baliak, kutiko Padang dibebaihkan dek Tantara Pusaik.

“Tapi… tapi… Kolonel Yani ‘kan baru pulang sikola dari Amerika?” saurang kumandan paleton kami, sato pulo manyalo. “Pandaratan Padang dalam ilmu parang modern, alah tatingga pulo. Alah jadi kalasik, baitu? Pandaratan Padang bulan April 1958, sadangkan pandaratan tantara sekutu di Normandia, di patangahan 1941. Sakita 17 taun kamudian.”

“Tapi dalam ilmu parang, indak ado nan kalasik do!” Kumandan biasonyo urang nan banyak mambaco. Kadang-kadang di kapalonyo lanca curito parang nan gadang di dunia. Panyerbuan Napoleon ka Moskow. Inyo apa buku-buku teori ilmu parang. Claswick, Mahann, dan ahli strategi Cino Kuno, Sunt Zu.

“Kalau strategi Mao Tse Tung?” Kumandan Peleton nan lain sato pulo. Dalam parang sudaro, antaro kumandan jo anak buah taraso padu manyatu.

“Dalam parang sudaro di Cino, antaro tantara Mao Tse Tung jo Tjiang Khai Sheik, banyak pulo nan dipelajari.” Kumandan sadang manggatok lado kutu. Karano inyo paminum, bilo indak ado minuman, inyo ganti jo lado kutu. Lado padi.

“Long Mars Mao ka Yenan, terkenal dengan parang sudaro di Cino. Jaman itu, banyak lahie taktik jo strategi. Salah satu nan populer: musuah banyak awak lari, musuah saketek awak libeh sampai mati.”

Latusan mortir lapan indak tadanga lai. Matoari patang mandok di puncak bukik. Nyanyian rangik basiua. Malam ka datang pulo lai