Mambaco Ratak Tangan

"MAMBACO-BACO buku kenangan (memori) sangat asyiknyo.” Parewa sadang minum kupi pagi. Matoari lambek-lambek maninggakan puncak bukik. Awan tipih bararak sapanjang lambah nan landai.

“Parasaian jo nasib datang tubi batubi. Sarupo induak kureta api baro mambaok garobong panjang. Sasak angoknyo manurun Anai.” Ciek Uniang sato pulo sakaki, sarupo marendo tilakuang jo maanyam lapiak.

Lapau alah mulai langang, urang-urang pai ka sawah jo ladang. Tapi Malanca sadang mangulengsengkan kaki sarawanyo singgo lutuik, sabok jalan kampuang alah jadi kubangan kabau.

“Memoar sia nan Parewa baco tu,” Malanca malengong ka Parewa. Mato Ciek Uniang tasendengan mangijok, raso mancimeeh.

“Bagawan Pajuang Sumitro Djojohadikusumo. Urang-urang Partai Sosialis (PSI). Maimbaunyo jo namo kasayangan Cum. Sumitro. Kutiko talibat jo PRRI/Permesta, asyik juo awak mambaconyo,” kecek Parewa sarupo mambari kuliah kapado mahasiswa semester satu.

“Kaputusan ko ambo ambiak sabagai putra Indonesia, yang dengan tulus ikhlas jo partimbangan-partimbangan murni, bahasrat untuak senantiaso ikuik dalam mambantu panyalasaian masalah-masalah nan kini diadok-i rakyaik Indonesia. Demi keselamatan, karukunan, kamajuan jo kautuhan masyarakaik nagari kito. Ambo gumbira sakali alah lapeh dari jaringan setan penahan rejim Soekarno ko. Ambo akan dapek babuek banyak di lua tahanan.” Sarupo tu nan ditulih dek Sumitro dalam sabuah surek tabukak nannyo layangkan kapado pers pado tanggal 1 Juni 1957.

“Banyak panjalasan nan alun dapek di awak salamo ko.” Parewa sarupo asyik bana jo carito buku Sumitro tu. “Ado fakta-fakta nan salamo ko ilang, indak jaleh kalalaiannyo sarupo iko.”

“Sumitro lalu manamui Sutan Syahrir di kadiamannyo, di Jalan Jawa. Sumitro mancaritokan manganai apo nan manimpo dirinyo, bahaso inyo handak ka ditangkok, jo pasiti juo tarhadap kawan-kawan nan lain. Kapado Syahrir, inyo mangamukokan nieknyo sacaro ikhlas bagabuang jo daerah. Sangkek tu, Sumitro memang sadang giek mamparjuangkan otonomi daerah.” Itu tulih buku kanangan Sumitro,  nan baru tabik dek Panabik Sinar Harapan bulan April 2000 tarbitan paratamo. Bulan Mai 2000 tarabitan ka duo. Iyo laku bana buku tu.

“Parewa mambaliak-baliak buku tu. Sumitro manamui Sutan Syahrir bahaso inyo ikuik PRRI/Permesta. Syahrir tak kabaratan, bahkan inyo manjawek, ‘Oke Cum!’”

“Tapi kok daerah tapancia-pancia saparati tasingkia sandiri. Ado Dewan Banteng, ado Dewan Gajah, Dewan Garuda. Usaokan sadonyo tu bisa bersatu,” tulih Sumitro dalam buku Jejak Perlawanan Begawan Pejuang Sumitro Djojohadikusumo.

Di nagari awak ko, kutiko tajadi pambarontakan tu, PSI tabagi duo. Ado nan pro, ado nan indak. Nan pro ikuik ka rimbo, nan tak sato tingga di dalam kota. Kudian tatangkok. Ado nan dikirim ka Ambarawa.” Parewa mamilin-milin sisunguiknyo nan lah mulai mamutiah.

“Sangkek tu, kutiko pambarontakan tajadi, ambo jadi seksi G tukang uruih logistik.” Ciek Uniang sarupo maleseang barapi-api. Taringek inyo jo urusan nasi bungkuih untuk pasukan nan sadang baparang di Bukikkaluang jo Bukikkawin di Tilatangkamang.

“Kalian aruih sarupo ikan jo aie, jo parjuangan daerah awak ko!” Takana dek Parewa pidato Kapalo Pulisi Sumatra Tangah di Gaduang Kasajahteraan di Birugo Bukiktinggi. Sangkek tu Parewa bapangkaik Agen Pulisi Kapalo. Tapi kok pangkeknyo randah, inyo tamaik SMA bagian A Bahasa taun 1957. Ratak tangannyo sarupo pulo jo Sumitro Djojohadikusumo tu