“Baa kaba?”
“Sarupo ko nyo.”
“Lai sanang-sanang sajo?”
“Kok banyak bana tanyo.”
“Taragak bana ambo!”
“Ampek puluah taun indak basuwo”.
“Alah banyak cucu den.
Salapan, banyak-e.”
Ajo Kutar, sadang maota kareh
jo Ajo Sidi. Nan surang bugih lamo. Nan surang tanun Kubang. Nan ciek suto, nan
ciek lai banang duo ribu. Saruang bugih sajuak. Saruang Kubang maisok paluah.
“Baa kambie kini, Jo?”
“Alah jarang buah-e. Banyak
abih dek tupai!”
“Gardam ingu, lai laweh
parak-e?”
Kato-e, ari Jumaik, Ajo Sidi
ka pai ka Medan maliek anak-e. Sabok urang ka masuak puaso.
Ajo Kutar tasunguik. Anak-e
alah alamo indak maagiah kaba. Antah baa we-e kini di rantau. Agak se-lah, we-e
kan manggaleh di kakilimo.
“Garimih manangih.”
“Ati den taibo.”
“Rusuah!”
“Indak!”
“Apo nan ka dirusuahkan.”
Matoari mandok di awan
cabiak-cabiak bulu ayam. Agin tajam, sarupo taji. Ari bakisa ka patang ari.
Paneh patang angeknyo alah urabi. Tabayang ka masuak puaso. Ari baik jo bulan
baik sadang mananti. Ta bayang sanok jo apam sarabi. Cindua saga ba santan
manih.
“Naiak!”
“Apo nan naiak?”
“Arago barang!”
“Ka masuak puaso, biaso.”
Iyo baitu, rang mudo. Ajo
Sidi manjungua ka lua jendela lapau.
Lalu mancaliak ka tv. Amerika sadang mamborbardir Afganistan malam ari. Dalam
sajarah, Afganistan tu indak panah tajajah. Takana Iskandar Aguang takapuang di
lambah Pansyawar. Afganistan, nagari nan alah malaiakan penyair-penyair gadang. Ingek Rumi, ingek Attar dan
Al-Afghani.
“Rusuah,den!”
“Nagari gadang suko malendo.”
“Inyo nagari kayo.”
“Sado-e ka inyo bali.”
“Sia lawan-e?”
“Osama Bin Laden.”
“Siapo tu?”
“Urang Arab nan kayo.”
“Osama Bin Laden simbol
palawan taradok Amerika nan ongeh!”
“Kecek, sia?”
“Tulih buku-buku. Ajo Sidi
mambayangkan wajah nabi, sarupo nan ditulih Mohammad Haykal dalam bukunyo Muhammad.”
Parewa sadang mambaco puisi nan sadang dilawan dek
roket-roket Amerika di Afghanistan...RMS
Tidak ada komentar:
Posting Komentar
Terima kasih telah memberi komentas